Reviews

Y trydydd mewn cyfres wreiddiol o ‘straeon denu darllen’. Wedi eu hanelu at blant 6+, dyma ddwy stori ffraeth a difyr sy’n cynnwys sefyllfaoedd a chymeriadau lliwgar y gall plant heddiw uniaethu â nhw. Lluniau du a gwyn hwyliog gan Hannah Doyle.

Y BWS HUD
Hen drwyn oedd Mabli Mai. Doedd dim byd yn well ganddi na rhoi ei thrwyn smwt ym musnes pawb. Roedd hyn yn ei chael i bob math o helyntion. Ond mae un daith ar y Bws Hud yn newid popeth...

O.M.B.
Cawr clên a charedig oedd Orig Mwyn Benfawr. Daeth tro ar fyd, a dysgodd O.M.B. pa mor anodd yw hi i fod yn gawr clên a charedig pan fo’r ‘Bobl Fach’ yn creu llanast o hyd!
*Cyhoeddwr: Gwasg Carreg Gwalch*

Dyma ddwy stori arall wreiddiol a difyr yng Nghyfres Clec. Bwriad y gyfres yw denu plant tua 6 oed i ddarllen, a does dim dwywaith fod Eurgain Haf, awdur y ddwy stori, wedi llwyddo i greu cymeriadau doniol a straeon bachog. Mae negeseuon pwysig yn cael eu rhannu yma, gan ddefnyddio iaith gyfoethog o ran geirfa a phriod-ddulliau, ac mae’n debyg y byddai angen peth cymorth ar y darllenwyr ifanc i ddeall pob gair.

Yn ‘Y Bws Hud’ cawn hanes Mabli Mai. Mae Mabli’n ferch fach fusneslyd iawn sydd eisiau gwybod hanes pawb! Yn wir, wrth fod mor fusneslyd, mae’n ei chael ei hun ar fws yn llawn o’r bobol ryfeddaf, a’r bws yn mynd i ‘Un Man ac i Bob Man’.

Yn ystod y daith, mae’n nhw’n ymweld â mannau rhyfedd hefyd; llefydd fel Llansannau sy’n ddrewllyd iawn, ac Aberysgwydd sy’n llawn adeiladau a chestyll anferth. Cyn hir mae Mabli'n cael llond bol ar hyn i gyd ac am ei throi hi am adre. Ond dyw’r gyrrwr ddim am droi’r bws ar urhyw gyfri, ac erbyn hynny mae’r teithwyr eraill i gyd yn chwerthin am ei phen. Druan o Mabli? Wel, bydd raid i chi ddarllen er mwyn gweld sut y daw'r antur i ben.

Yn yr ail stori, cawn hanes O.M.B. (Orig Mwyn Benfawr). Mae Orig yn gawr, ond cawr caredig yw e, fel mae ei enw’n ei awgrymu. Sylwodd ei fod yn wahanol i’r cewri eraill pan aeth i Ysgol y Cewri. Roedd y cewri eraill eisiau codi ofn ar bawb, ond eisiau helpu’r ‘Bobl Fach’ roedd Orig am ei wneud.

Heb yn wybod i neb, roedd e a’i gi bach Smotyn yn byw mewn ogof o dan y Cerrig Siglo. Trwy ei berisgop, roedd wedi bod yn astudio’r Bobol Fach yn mynd â’u cŵn am dro, yn siarad am y tywydd ac yn gwrando ar eu sgyrsiau. Roedd yn arbennig o hoff o glywed pobl yn dweud “O, Mam Bach”, gan mai dyna lythrennau ei enw ef hefyd. Ond roedd un peth yn gwylltio O.M.B., a hynny oedd yr holl sbwriel oedd yn cael ei daflu ar lawr gan y Bobl Fach. Byddai Orig yn casglu gwahanol eitemau ar gyfer eu hailgylchu; bu’n rhaid iddo roi cymorth i anifeiliaid oedd wedi llyncu sbwriel hefyd, a helpu Smotyn wrth i hwnnw fynd i drafferthion yn y bin ...

Erbyn diwedd yr hanes mae O.M.B. wedi cael llond bol ar rai o’r ‘Bobl Fach’ ac wedi penderfynu bod yn gas am unwaith. A wnaeth hynny lwyddo? Gwell i mi beidio â difetha’r darllen i chi.
*Hefin Jones @ www.gwales.com*