Reviews

Addasiad o Grandpa Christmas gan Michael Morpurgo.
*Cyhoeddwr: Atebol*

Addasiad Cymraeg Mari Lisa o Grandpa Christmas gan Michael Morpurgo, yr awdur plant uchel ei barch, yw Anrheg Nadolig Taid. Mae hi’n stori annwyl ac atgofus sydd â neges amserol am ofalu am ein daear. Roeddwn i’n edrych ymlaen yn arw at gael darllen y llyfr, diolch i apêl y clawr deniadol sy’n dangos un o ddarluniau arbennig Jim Field. Rydw i’n hoff iawn o’r darluniau bendigedig drwy'r llyfr; maen nhw’n ychwanegu at naws gyfarwydd, hiraethus ac agos atoch y stori, ac yn adlewyrchu ei thema ganolog. Mae’n llyfr dwyieithog, ond mae wedi ei ddylunio mewn modd sy’n rhoi blaenoriaeth amlwg i’r Gymraeg, gyda'r Saesneg mewn ffont llai ar bob tudalen. Mae’n darllen fel cyfrol Gymraeg, felly, ond gall darllenwyr di-Gymraeg ddilyn trywydd y stori ar yr un pryd. Ni cheir stori anturus, gyffrous yma, ond yn hytrach fyfyrdod ar ffurf llythyr gan Taid i’w wyres fach. Mae’r stori’n dechrau o safbwynt yr wyres, Mia, sydd bellach yn oedolyn wrth iddi ddisgrifio sut y mae hi’n rhannu llythyr a gafodd gan ei thaid pan oedd hi’n blentyn gyda’i theulu bob Nadolig. Wedyn, cawn ddarllen y llythyr, gan glywed am ddymuniad Taid am fyd gwell i’w wyres fach. Mae’n ei hannog hi a’i chenhedlaeth i ofalu am y ddaear – am fyd natur, ei chreaduriaid a'i moroedd. Yn y llythyr, mae’n datgan ei ddymuniad y caiff hi fyw mewn byd heb ryfel na gwastraff, heb newyn na llwgu, a lle mae’r moroedd yn lân a chreaduriaid yn rhydd, heb berygl o gael eu hela neu gaethiwo. Rwy’n teimlo i mi allu dychmygu cymeriad Taid yn glir, gan deimlo’n agos ato a pharchu ei egwyddorion tuag at warchod ein planed. Er i mi deimlo bod y llyfr yn gorffen braidd yn swta, rwy’n edrych ymlaen at gael ei ddarllen yn uchel i fy mhlant bach. Dydy’r iaith ddim wedi ei symleiddio’n ormodol, ond nid yw hi chwaith yn rhy anodd i blant i'w deall. Mae darluniau hyfryd a neges gadarnhaol, obeithiol y stori yn gwneud hon yn anrheg wych i blentyn ifanc.